فشلنا

شو اللي بهلصورة بيفرق عن كل صور الثورة اللي فيها دم لحتى هزتني كل هلقد ؟
الصورة هي من حي الشعار الحلبي اللي انعدمت فيه الحياة من أشهر وتغيرت معالمو كمنطقة حلبية بعد ما خسر العديد من معلامو وبناياتو

الصورة مانها اول صورة بتعرض الدم السوري عم يسيل من جسد طفل
مانها اول صورة بتعرض الحسرة والقهر بدموع الأب وعيونو
مانها اول صورة بتأظهر فشل المحاولات الطبية ترقيع الوضع الحالي وتداركو وتخفيف وجعو
ومع هلشي بتهز الواحد وبتقلبلو كيانو
بتلخص كلشي ... بتحكي كلشي ما بينحكى ... بتصرخ بكلشي ما بينقال

المصيبة انا انت وانت رح ننسى هلحادثة وهلصورة ورح تمرق متل ما مر متلها الآلاف خلال آخر سنة ونص دموية من حياتنا كسوريين... انا بعد 3 ساعات بالكتير رح انسى هلصورة وارجع اضحك مع رفقاتي اذا حدا مزح معي
او رح نام متدايق وفيق بكرا افتح البراد لشوف اش ممكن آكل او دق لرفقاتي لننزل بالمساحة الضيقة المتاح التحرك فيها نشم هوا
كل هلدم رح ننساه واللي ما بينساه رح يبادرو اصدقائو الصدوقين بالنصح والوعظ بأنو اهبل وحاطط الحزن بالجرن ومنغلق على حالو ورح يحاولو بكل الطرق اعادة تذكيرو انو نكرة ما طالع بايدو تعمل شي فليش عم يحمل هم اكبر منو!

اذا كان هلواقع فعلا اكبر مني منك وفعلا ما منقدر نغيرو او حتى نوقفو.. ليش بتدايق وبتعصب وقت بتشوفني عم ئلك كس اخت هلعيشة ويلعن دين هلحياة وليش المحاضرات الاخلاقية بضرورة انتقاء الكلمات واللباقة اذا الواقع عاهر حقير لهلدرجة

التعليقات واللايكات غير مرحب فيها هون ولا بأي شكل من الأشكال 

لا الدعائي ولا النقاشي ولا الحواري ولا حتى التعاطفي او الوعظي

الصمت والاحساس بالعار والخزي يفترض يكون هوي سيد هلموقف