وطن النور والظلمة

اول مرة رحت فيها على باب النصر كنت صف رابع رحت مع بابا اللي اخدني لهنيك مشان يعرفني علمنطقة طلعنا من طرف السيد علي جنب مدرسة المعري علطريق خبرني انو بهلشارع بالذات مشي وهوي بعمري مع ابوه ليعرفو على المنطقة وحب يمشيني بنفس الشارع ليتذكر هديك الايام بتذكر اني كتير فرحت وحسيت انو اللي عم يعملو بابا تقليد عائلي الا شوي ولازم حافظ عليو ومشّي ابني بنفس الطريق بنفس العمر اول محل عليمين كانت المكتبة اللي اشتري منها دفاتر بالجملة وقت كنت مسؤول بالجيك تاني محل عليسار كان دائما يحط زينة متل الي كنا نعلقها بالصف ايام الاعياد ورا زاوية المصور في محل ببيع فطاير لحم بعجين على مستوى سوريا ... كل هلشي هلق بصورة وحدة اختفى! متل كلشي بهلبلد حلب القديمة ... باب النصر ... ويا حيف

شو اللي بهلصورة بيفرق عن كل صور الثورة اللي فيها دم لحتى هزتني كل هلقد ؟ الصورة هي من حي الشعار الحلبي اللي انعدمت فيه الحياة من أشهر وتغيرت معالمو كمنطقة حلبية بعد ما خسر العديد من معلامو وبناياتو الصورة مانها اول صورة بتعرض الدم السوري عم يسيل من جسد طفل مانها اول صورة بتعرض الحسرة والقهر بدموع الأب وعيونو مانها اول صورة بتأظهر فشل المحاولات الطبية ترقيع الوضع الحالي وتداركو وتخفيف وجعو ومع هلشي بتهز الواحد وبتقلبلو كيانو بتلخص كلشي ... بتحكي كلشي ما بينحكى ... بتصرخ بكلشي ما بينقال المصيبة انا انت وانت رح ننسى هلحادثة وهلصورة ورح تمرق متل ما مر متلها الآلاف خلال آخر سنة ونص دموية من حياتنا كسوريين... انا بعد 3 ساعات بالكتير رح انسى هلصورة وارجع اضحك مع رفقاتي اذا حدا مزح معي او رح نام متدايق وفيق بكرا افتح البراد لشوف اش ممكن آكل او دق لرفقاتي لننزل بالمساحة الضيقة المتاح التحرك فيها نشم هوا كل هلدم رح ننساه واللي ما بينساه رح يبادرو اصدقائو الصدوقين بالنصح والوعظ بأنو اهبل وحاطط الحزن بالجرن ومنغلق على حالو ورح يحاولو بكل الطرق اعادة تذكيرو انو نكرة ما طالع بايدو

احدى المواقف المريت فيها كانت بمدرسة من مدارس النازحين الرصاص عم ينضرب بشكل فجائي على الحيط المقابل للباحة اللي كنا فيها وانا كان معي مجموعة اولاد بحركة لا ارادية بسحبن عالزاوية وبوقف جنبن بحاول لهّين عن الموضوع واحكي معن وضحكن بعد ما خلص الموقف بحدود الربع ساعة بيجي ولد من هلولاد بئلي: استاذ ايمت بدي صير كبير ؟ بجاوبو :مع الايام رح تكبر اكيد! ليش بدك تصير كبير ؟ بئلي: لحتى ما خاف! بابا قلي اني خفت لأني صغير وانت لأنك كبير ما خفت ! يمكن حكيت بأكتر من المدة اللي بيحكي فيها الفيلم، بس بالحالتين بالصوت او الصورة للفيلم المدتو 44 ثانية عم يكون علينا واقع اتقل من اننا نحملو وعم نشوف قدام عيونا معاناة جيل كامل رح يبقى عم يتذكر هلأيام بتفاصيل مشوهة وبمشاعر متضاربة فاذا ما عنا القدرة نتجاوزها خلونا على الأقل نحاول نوصفها

الطوفان بيحكيعن مدارس اشبه بالسجون والمعتقلات منشأة لتحاكي مدارس كوريا الشمالية الفريدة من نوعها بالعالم بعدم ايا فردية بالانسان وقتل كلشي بميزو عن بقية البشر. مناهجها المصدية اللي بتحشي بالطفل معلومات قد تكون مفيدة الا انها مصممة على انو ما يستفاد منها بحياتو وبكل وقاحة بتطرح اهمية الحرية وانو الحيوان (القطة بحسب درس القراءة التم تصويرو بالصف) بحس بشعور الحرية وبطالب فيها وبيسعى الها وانها حق من حقوقو بتبيعك شعارات ووطنيات وهية عم تعيشك العكس تماما بكل مجالات الحياة وبالها مرتاح بانها عرفانة هلشعارات ما ممكن حدا يعتبرها اكتر من مجرد علاك مصدي كون كل سلوكياتها بالحياة بتأدي لعكس هلشعارات عن انجازات حزب غيّر مجرى التاريخ لوطن كامل متل ما غيّر مجرى النهر ليدفن كل الحضارات وكل القيم الموجودة عند الشعب وربّى العالم على انو جرائمو غير المغفترة بحق التاريخ هية انجازات لازم يسفقولها ويمجدو اصحابها اللي حولو البلد لمزرعة الن كل المشاهد المؤلمة والمخجلة بالفيلم من عضو مجلس الشعب اللي بيتفاخر انو صرلو 50 سنة عضو وعم يحصل على مكافئات ومكتسبات لمدير المدرسة اللي بكل بساطة بئلك انو هوي

مكيافيلي قالها بالقرن السادس عشر : ( الغاية تبرر الوسيلة ) في سياق تبرير العنف المتبع للحفاظ على السلطة حاولت ثقافة الانسانية الحالية تمدّن البشر وتحولن لكائنات اكثر رقي عبر عزل المقولة السابقة عن القسوة والوحشية والعنف بالصراع على السلطة وتوظيفها بمجالات تانية بالحياة سمحت للمقولة توصلنا عن طريقها كالغش بالامتحان او الكذبة البيضا . في بلاد غير متمدنة عم تعيش مرحلة القرن الخامس عشر بايطاليا او ربما اقل لا تزال القسوة والوحشية في صراع الحكام على السلطة تعتبر لكتيرين مبررة تحت خانة الوسيلة الهادفة لغاية أسمى! تماما متل ما كان ماكيافيلي قاصد على ايامو! القذائف اللي عم تنزل علمدنين من الطرفين، التفجيرات اللي عم تصير بشكل هستيري لا يمكن ولا بأي شكل من الاشكال تكون مبررة ولا تحت ايا بند ولا في سبيل الوصول لأيا غاية وهلكلام يصح خارج اطار الفعل ورد الفعل ومقولة لا يحق للشخص اللي ما ادان الفعل ادانة ردة الفعل رفض هلوسائل في الصراع المميت شيء مفروغ منو انسانيا واخلاقيا اما التمسك بهلتفاصيل اللي بتحدد هويتنا كبشر وكسوريين او السقوط الكامل بدائرة الخيانة لقيمنا ولانسانيتنا ولوطنا