سنة للتاريخ

اني اليوم ابشركم بفرح عظيم يكون لجميع الشعب

قبل الـ 2011 كنت دافع عن سوريا خصوصا بالهجوم من قبل غير السوريين وبشكل خاص اللبنانيين
كنت دافع بمنطلق التعصب والتطرف لسوريتي رغم جرحي الكبير انو شعبي الجزء الأكبر من المشكلة ... هوي بسلوكو اللي عم يختارو عم يكون جزء من واقعو السيء. بمعظم الانتقادات اللي عم تتوجهلي كـسوري كنت اهرب منها عن طريق التبرأ من المسؤول عليها، انو يا اخي لا تعيّرني بسلوكيات اشخاص انا فعليا ما كان الي ايا ايد باختيارن وبالتالي مافي الي ايا قدرة على محاكمتن او حتى محاسبتن او مسائلتن

من وقت حكاية كريم قبل سنوات فقدت ايماني بهلشعب كجماعة بتحمل قضية وكرامة وككتلة وواعية على وضعها وقادرة تشوف حالها بالحضيض وعندها الامل لتغيير موقعها بالحضيض كمجموعة عم تتذيل كل تصنيفات البشرية بمعظم مجالات الحياة ان ما كان كلها.

لفترة طويلة كان بنظري شعب سوريا مجرد نماذج (وانا بكل تأكيد واحد من هلنماذج) فارغة من كلشي، الواحد منها بيحكي بالتواريخ والامجاد وهوي بينتمي بالواقع  لاكتر شعوب الكرة الارضية (متلو متل بقية العربان) تخلفا واستجرارا للتكنولوجيا والتطور.
شعب بينحمق ع كاريكاتور بورقة ضمن صحيفة ما بيعرف حتى يتهجأ اسمها وعلى فيلم بصوّر المسيح باحد مشاهدو عم يشرب بشي بار... بينمحق وبسب وبيطلع صوتو .. وهوي ع اقرب القضايا القريبة واللصيقة بحياتو .. درسو ... اكلو .. كرامتو .. حقوقو ..ومستقبل ولادو.. ما قادر يفتح تمو ولا حتى يعبر عن امتعاضو! لا بل العكس! راضي ومبسوط و"الحمدلله" جواب ما بيستغنى عنو لو شو ما كان وضعو يكون!

هلحكي كان تاريخ ... كان شي قديم
بهلسنة صار لشعبي قيمة ولوجودو قضية بعيون سكان الكرة الارضية كلها والاهم بالنسبة الي انو بعيوني انا اللي كنت فاقد الامل بوجد حياة حقيقية قادر هلشعب يحلم فيها

صار من واجبي اكتر مما هوي من حقي دافع عن هلشعب، مو من منطلق تعصبي بالعكس من منطلق فخر بانتمائي
2011 ... رغم كل الفشل الشخصي والعاطفي والعائلي وبقية الحشاكيل ... انتي الاجمل بتاريخ حياتي وبتاريخ شعبي .. واللي قال عنك (كل السنوات سنوات إلا 2011 وحدها تاريخ) ما عطاكي حقك.

بنهاية السنة التاريخية اللي كل فصولها ربيع ..رح اشرب وبفخر كاس عزّك يا سوريتنا الصغيرة اللي رح نعمرها... كاس فرحك ومجدك
كاس أرضك وتاريخك والاهم من كلشي مستقبلك
كاسك سوريا
كاسك يا احلى وطن
كاسك يا شعب سوريا
كاسك يا اسطورة يا اعظم امثلة البشرية بالامل