اولى ليالي الاربعو عشرين

شفت رفيقي الحكيم
-كيفك يا حكيم بعد زمان ؟
شاف شي مدلّى من رقبتي
-شو هاد ؟ عم تشيل زوادة نبيت ( نبيذ )
-لا عمي ما وصلنا لهلمرحلة ...هي كاميرا
-اوف ! انا كتير بحب التصوير بس مافي كاميرا

تذكرت انو انا كمان صاير بالفترة الاخيرة عم حب الكمنجة ومقرر ارجع دق عليها بس مافي مصاري لأشتري وحدة جديدة او صلح القديمة وجبلها اوتار وقوس جديد
كس اخت المصاري لك انو قديش المصاري حاكمتنا ؟ ولك حاكمة مواهبنا او الشغلات اللي منحب للحظات نعملها !

- تعا يا حكيم فرجيك الشي اللي بتقدر تعملو بهلكاميرا مع انها قديمة وجربانة
طقطقتلي كام صورة علسريع انبسط فيّن الحكيم وكملنا بطريقنا علبيت

بح

لمبة مشعولة هلا والله

وصّلت الحكيم اللي حكالي عن رفيقو اللي كان بالحديقة عم يدخن ويحشش ويعمل مسودة حزب ناوي يأسسو ووقت الشباب الطيبة ئفشوه حسبوه مجنون لحالتو النفسية ولخربشاتو اللاعقلانية !
لك بدو يأسس حزب ! اي بلا ما كون عم عيش الموقف رح قول عنو مجنون فكيف اذا كان عم يعمل هلشغلة بحديقة عامة وفوق المنها قاعد عم يشرب دخان كمان !
ودّعت الحكيم وكملت طريقي حتى شفت ولد معلّق من التابلييه تبع طلائع البعث بس هوي هربان منها
وفي بجيبو قنينة لبن

اجيال المستقبل

والله متطورين طلاب المدرسة ! على ايامي كنا نحط تفاحة بجيبنا ...

بالطرف التاني من الشارع في شحاد عم ينبش بالزبالة ويطبّق الشغلات الثمينة اللي عم يلاقيها على بسكليت الله وحدو بيعرف كيف شايل كل هلكياس
طبيعي تلاقي شحاد بهلمناطق كونها من الطبقة الارستقراطية اللي ما حدا عم يموت من بردو فيها
وللمعلومة فقط كيلو الورق الكرتون عم ينباع ب 7 ليرات بالبلد لحتى يستفيدو منو معامل اعادة التدوير recycle ويمكن هلق مع المازوت والغاز والفحم يصير كيلو الورق ب 70 متلو متل ايا شي قابل للاشتعال
حتى الانسان عم يغلى بهلأيام باعتبار صاير مافي اسهل من تشعيلو
حاولت القط للشحاد شي صورة معتبر .. انو عم يتحرك ومافي اضاءة وما مشي الحال وبكل الاحوال انا شبه متخبي

تاريخ وحضارة

طبعا عين الامن الساهرة على حماية الممتلكات العامة اجت دقت فيني انو شو عم تعمل يا اخ ؟
بالله العظيم شو ممكن كون عم اعمل وانا شايل كاميرا ؟ عم ازرع قنبلة مثلا ولا عم احفر لأستخرج بترول !
بعد مناوشات قصيرة انقلعت من خلقتو متل ما طلب مني
شفت قطة بردانة خفت صورها انو لسع الزلمة بضهري وريحة جاكيتو الجلد معلقة بانفي مع اني مكرّب ومزكم
قلت لسجل موقف ... صورت رجلي .. كمان رجلي جزء من الاملاك العامة الممنوع تصويرا ! لا يا عمي خلي كل البشرية تصورلي رجلي ما بزعل
انو دائما عم دور علتفاصيل بالطرقات وتحت السيارات وولا مرة لاحظت او خطرلي لاحظ انو موديل رجلي من فوق وقت بطلع علين بيطلع كتير ظريف وكأنو عم يقلي " صورني صورني"

احفاد الكواكبي

آخر شي علدرج شفت شباك
كاني اول مرة بشوفو ولا كأني منفي وهي اول رجعتي من بعد سنين طوال
مع اني انا الكاسر عامودو اليسار وقت كنت صغير بس شكلي نسيتو

شباكك مطفي

ليش كانت القعدة على هلدرجة الصغيرة حبها كتير وقضي ساعات عم اتفرج علعالم بالطرقات ؟
او حاول انا واختي نمرن حالنا ذهنيا لنوصل لمرحلة التزامن الصحيح بين سرعة حركة العالم تحت والزمن المناسب للبزق من الشباك لضمان توقع البزقة علين !
قعدت علدرجة الصغيرة للشباك .. اخدت برد وبلشت طالع روايح
قلت لأطلع على بيتي انضب
وكان كذلك
بشرفك ... طلّع بقرب مراية جنبك .. قديشك انسان يائس من حياتو لحتى كملت آخر كلمة من هلحكي البلا طعمة ؟
انو منتظر مني ضمن هلحكي قدملك اثبات كروية الارض مثلا ؟ او اشرحلك على النظرية النسبية ؟ او اكتبلك معادلات احتراق المواد النووية ؟
انا عن حالي عم اكتب ومالي خلق اقرا
ولالي خلق عدل او حتى دقق اذا في كلمة سقطت سهوا معي او لا
فليش انت لتصير ملكي اكتر من الملك !
يا عمي دور بدل الحياة فيها ديناميك وما بحياتها بتتوقف

رح تقلي شو خص العنوان بالمضمون ؟ اي معك حق
اليوم هوي اول يوم الي بسنتي الاربعو عشرين
انشالله العمر كلو .. بعرف هيك حتقلي
وانا من عندي بقلك .. مافي للأبد .. متلي متل كلشي بهلدنيا .. رح انقلع واترك مساحة لغيري ليعيش ... وهكذا دواليك