الثقة
- خير شبك ليش عم تبكي ؟
- عم ابكي لأنو شعبنا ببكي
- بتعرف شغلة .. ديما كلمة "شعبنا" بتستفزني لأنها مو واضحة ومعناها شمولي كتير بس بدي ابلعها هلمرة وارجع اسألك شبك ليش عم تبكي ؟
- شمولي اي شمولي ..
- لك جاوبني ولو لا تتهرب
- عم ابكي لأنو انفتح الفايسبوك واليوتيوب والبلوغر
- ولك يا ضرسان من الفرحة نزلت دمعتك ! خوفتني عليك يا زلمة
- لك ايا فرحة وايا اكل هوا
- العمى ! فتت بالحيط انا !
- اي فوت فوت وكلما بتفوت اكتر كلما بتصير مواطن صالح اكتر . يا اخي عم ابكي اي وطبيعي بدي ابكي
وقت المواقع السورية الاخبارية الحكومية وشبه الحكومية بتحطلك بصفحتها الرئيسية وبكل ممنونية خبر بعنوان مشترك ومستنسخ ( تعبيراً عن ثقة الحكومة بالشعب تم فك الحجب عن يوتيوب والفايسبوك) وبتلاقي تحتو كل التعليقات مدح بالحكومة ودعوات باطالة العمر وبكون كل المعلقـــ
- فهمت عليك فهمت عليك
زاعجتك ممنونية العالم لشغلة عيب نحكي عليها بالاساس انها من بديهيات حقوقو وزاعجتك كمان كلمة ( ثقة الحكومة ) لأنها ضمن هلسياق بتخلي الحكومة غير واثقة بالشعب طوال كل الفترة الماضية بالوقت اللي لازم يكون الشعب هوي اللي بيحمل ورقة منح الثقة يعني الشعب لازم يا اما يثق بحكومته او ما يثق .. مو الحكومة اللي بتلعب هلدور
- اول شي ليش قاطعتني ؟ تاني شي شايفك عم تحكي بمصطلحات شمولية متل الشعب والحكومة ؟
- من فرط الحماس دبّت فيني الروح الوطنية بعتذر منك ..بس خبرني حكي مو صح ؟
- اي في شي من حكيك صح بس خليني كملك فكرتي
الزاعجني واللي عم يخليني ابكي ونوح متل مانك شايفني .. انو العالم عنا عايشة بهبلنتها وكل فرحتها انو الفايسبوك وبقية الشلة انفك الحجب عنها
- لا لهون وبس .. رجعني خطوة لورا .. فتت بالحيط نظامي بآخر فقرة .. عدلي ياها بالتفصيل الممل
- مالي خلق احكي كتير بس بشرفك وضميرك وناموسك وكلشي غالي عليك ... حكومة بتحجب قبل اربع أيام كلمة proxy عن كل محركات البحث وعن كل الصفحات اللي بتضمن هلكلمة وين ما كان موقعها من اللينك الخاصة بالصفحة .. مقتنع انها فتحت الفايسبوك وبقية الشلة المغضوب عليها محبة بشعبها وتعبيرا عن ثقتها فيو ؟
- كيف كيف ؟ شو عم تقول ؟
هاد هو فن "أن تقول في جملة ما يمكن أن يقوله الغير في كتاب"
ردحذفعنجد كيف كيف؟ شو عم تقول؟
...
رزق الهبل ,,,, عالمجانين
ردحذفوالثقة عبارة عن معادلة دقيقة أو ما بعرف شو تسميتها الرياضية أو الفلسفية ، بس من الضرورة جداَ أنّو لازم يكون الطرفين كل واحد بيوثق بالآخر ما بيصير واحد بيوثق بالآخر والآخر ما بيوثق فيه إذا أنت بتوثق بهيك حكومة نيالك وإذا ما بتوثق مو فارقة معها وهي منتهى غايتها
ويا لطيف الأدب العربي شو عوّيص
ازيك
ردحذفوحشتونا كتير
شكرا لزيارتك المدونة قريبا يا صديقى وعفوا لانى مسحت التدوينات القصيرة التى كتبتها تحت وطاة التاثر بالاحداث يوم الجمعه 28 يناير
مصر بخير والحمد لله
التظاهرات لها جوانب سلبية و اخرى كثيرة ايجابية
اكثر ما نخشاة هو الفوضى المطلقة
كتالوج تونس لا يمكن ان يسرى على مصر
وللاسف اصبح الاختلاف فى الرأى هنا فى مصر مشكلة و كثير من الاصدقاء انهدمت صداقتكم بين مؤيد و معارض
لكن عموما الثورة كانت شرف لكل المصريين ويارب تكتمل الاحداث بخير
تحياتى لك و لاصدقائنا و لوطنى الثانى سوريا و كل اهلها
منيح في حدا لسا عم يفكر
ردحذف@Khadija.april
ردحذفصدقيّو .. ما عم يزل عليكي بحرف .. انا بعرفو مالو عادة الا ويكون صادق
@ مشوار :
ردحذفبيني وبينك اول مرة بشوف حكومة تثق او لا تثق بشعبها
يمكن نحن نموذج متطور عايش لـ 500 سنة لقدام
وشبه الأدب العربي كل هلقد عم يصعب عليك المفردات ؟
احويلك قاموس جيب بينفع كتير
@Kontiki
ردحذفالمهم انك بخير
قصة مصر تحتاج لوقفة اكثر والخوف ان الفرعون الأكبر يتمسك فترة أطول بالكرسي
حاليا الوقت يمر لصالحه لا لصالح الشعب
وصلت الثورة للقمة وبدأت بالتخامد تدريجيا
فرحت انك بخير .. وكوني على ثقة بشعبك لانو اثبت وجودوا وقوة صوته .. ومتل هلشعب ما بينخاف عليه اذا استمر على هلمنوال بالمستقبل
@ حجة أمنية :
ردحذفواخو الجهالة في الشقاوة ينعم
مبروك
ردحذفالفيس بوك و بقية الشلة
بس حلوة قصة الثقة هاي عجبتني :)
المشكلة يا جفرا انو بتخلي الواحد يشك بحالو انو معه نقص كلس
ردحذفيا الله ليش ما عم يطلعلي قرون ؟
كل هلشي ولسع ما عندي قرون
اكيد نقص كلس
جد شي بيزعل و انا صار فيني نفس اخر جملة لما اكتشفت انو كل البروكييات انمنعت !
ردحذفأول مرة ازور مدونتك و حبيت كتير اسلوبك و طريقتك في توصيل الفكرة .