نصائح تقنية لموقع نادي الجلاء الرياضي

بما اني من عشاق نادي الجلاء والمشجعين للعضم لهلنادي الكبير
وبما اني بمتلك خبرة جيدة نوعا ما بمجال الويب ديزاين
حبيت اعطي شوية ملاحظات على الموقع لحتى يتطور ويتحسن اكتر مما هو عليه ، شفت انو الاسهل مما ابعت ايميل لأشخاص ما بعرفن .. اني اكتب هلشي وحطوا على صفحتي وانشرو بصفحة الجلاء علفايسبوك هيك بضمن انو المعنيين وصلن اقتراحاتي كاملة وواضحة مع الصور .

• طريقة عرض الاخبار : الاقسام - الصفحة الرئيسية

للأسف بتصنيفات الموقع في قسم واحد ( اخبار الموسم ) وفيو اخبار السيدات مخلوطة مع اخبار الرجال ومع اخبار الـ NBA ومع اخبار الدوريات المحلية والدوري اللبناني وكلو صاير بقسم واحد !
لازم ينعمل اكتر من قسم منفصل للأخبار  ما بكفي بس تعريف المسابقات بشكل منفصل لازم تكون اخبار كل مسابقة منفصلة عن بعضها  بحيث انو اخبار بطولة دبي للشركات تكون كلها بقسم واحد ومنفصل عن البقية نفس الشي لبطولة كأس الجمهورية، الدوري السوري ، غرب آسيا ، آسيا وبقية المسابقات .
اضافة لقسم خاص لكل رياضة تانية بالنادي غير الباسكيت
هلشي بيرجع بيفرض اعادة تشكيل هرمية الموقع بالقلم والورقة بعدين تطبيق هلهرمية على الموقع بالتقسيمات
وبناء على هلتقسيم لازم يكون عرض الأخبار بالصفحة الرئيسية
يعني ينعمل بلوك خاص بجيب آخر خبر مع صورة مصغرة من قسم السلة للسيدات مثلا وبيعرض تحتها 4 لينكات من نفس القسم للأخبار الاقدم منو بحسب التاريخ وهاد مثال على قصدي لـ 3 أقسام مهمة لحتى يتركز على أخبارها

نفس الحكي بالنسبة لبقية الاقسام الأقل أهمية انو كل قسم الو جزء مخصص وثابت بالصفحة الرئيسية ومو شرط بهلشكل التفصيلي ممكن يكون مجرد شريط صور وعناوين لآخر كذا خبر من قسم معين وانتهت القصة متل هلأشكال هي

يفترض ينعمل قسم للبينغ بونغ وقسم للتنس وقسم للسباحة بينحط فيو معلومات عن ممثلين النادي وآخر اخبار هلرياضات وبقية رياضات النادي .. هلشي بسلّط الضوء على رياضات النادي وبخليها تطلع أكتر وتنشهر أكتر علأقل على مستوى المشجعين المهتمين بنادي الجلاء ... بعتقد هي هية فكرة الموقع بالاساس انو تعريف العالم بأخبار النادي .. وهلشي أهم من نقل اخبار نادي الحكمة او اخبار سان انطونيو سبيرز اللي ممكن نقراها بأيا موقع غير ( الموقع الرسمي لنادي الجلاء الرياضي بحلب )


نقطة تانية لازم يتضمنها الموقع بشكل تفصيلي والصفحة الرئيسية هية عرض مواعيد مباريات النادي القادمة ونتائج المباريات اللي صارت مع ذكر اسم البطولة .
وما تكون مجرد جداول html لازم تكون مربوطة بداتابيز بس تعمل كليك على شي مباراةيطلعلك نتائج الكوارترز الاربعة وبقية السكاوتينغ للعبة مع لمحة سريعة عن نتائج المباريات السابقة مع لقطات منها ( في حال وجودها  ) بشكل بسيط وسريع تماما متل ما معمول بصفحة كوورة  بس بطريقة متناسقة اكتر وبتناسب النادي من ناحية الالوان وهلقصص
بالنهاية موقع الجلاء لازم يكون أرشيف الكتروني للنادي بكل معنى الكلمة ومع هلإضافة هي بعتقد فعلا رح يتحول الأرشيف بطريقة عملية وما يبقى مجرد صفحة نقل اخبار

• الصفحة الفردية المتضمنة عرض الخبر

ليش عم يكون الفيلتر كتير قوي على الصورة اللي ضمن صفحة الخبر ؟ انو خففو فيلتر يا جماعة او صغرو حجم الصورة عن طريق الأبعاد مو عن طريق الدقة
عم تصير صورة شبح ما عم نعرف لمين هية .. يعني بلاها بكون احسن بكتير
وشغلة كمان بدي قولها بخصوص الخبر ( مالها علاقة بالديزاين الجديد بس علقانة بتمي من زمان وبدي بقها ) ليش ديما في اخطاء لغوية ومطبعية بالأخبار اللي عم تنزل
اللي عم يكتبها خلي يراجعها مرة ومرتين وتلاتة قبل ما ينشرها
القصة ما بتاكل دقايق بس بتعكس رعونة ما حلوة تكون موجودة بموقع رسمي لنادي عمره عشرات السنين
ووين راح الارشيف القديم ؟ ليش ما تم نقلو للديزاين الجديد
حرام شغل كذا سنة يطير كلشي فيو بكبسة زر لنرجع نبدا من الصفر
عملية النقل بترجع لنوعية البرمجية اللي كان مبني عليها الموقع بس كلشي واله حل وهلنقطة بالذات لازم ينعاد النظر فيها

• الصفحات الثابتة :

بقصد بالصفحات الثابتة الصفحات اللي مانها ديناميكية من ناحية المحتوى يعني اللي ما بيتغير محتواها ومعروف انها رح تبقى ثابتة
متل صفحة مجلس الادارة وتاريخ النادي وبقية الصفحات
هلصفحات هي لازم ينشغل عليها بطريقة جدية اكتر شوي مشان تطلع بصورة احترافية
يدخل فيها العناوين والتقسيمات والألوان والصور او حتى ممكن ينعمل فيها سلايد صغير بيعرض شغلات مهمة متعلقة بالصفحة او بأتعس الاحوال بلا السلايد خلي يكون ملف فلاش ممكن يتجدد بسهولة بالمستقبل يعني مثلا بقسم المنشآت ليش حتى ما ينعمل فلاش فيو صورة كل منشئة وموقعها على الخريطة والمستثمرين فيها وهيك قصص ..او بصفحة تاريخ النادي معقول مافي ولا صورة قديمة للاعبين بالنادي ؟ المشجعين عندن صور لتمانينات النادي والنادي بموقعو الرسمي ما عندو صور قديمة الو ؟ ) هلإضافات الصغيرة ( واللي بدها تنعمل لمرة واحدة فقط باعتبار انها صفحات بالاصل ثابتة وما عليها تغيير مستمر) بتعطي جمالية قوية كتير للصفحات وبتخليها تفاعلية أكتر من مجرد شلف حكي ورا بعضو ما فيو ايا عامل جذب
نفس الحكي بخصوص زاوية اللاعبين الحاليين واللاعبين القدامى
في تقنيات جديدة متل lightbox ومتل ال JQuery بتخلي المحتوى تحسو ملف فلاش ولا احلى من هيك وبأتعس الاحوال يا اخي حطوا ملفات فلاش متل ما هية ما بيستغرق تصميما اكتر من 20 ثانية
يعني هية تطبيقات سهلة وبسيطة وما فيها تعقيد بس بتحول هلصفحات لزوايا غنية بتخلي اللي يفوت عليها يحس انو فايت على موقع عليو القيمة بيعكس صورة النادي مو حكي مصفوف ومشلوف ورا بعضو . 

• Rss Feed

وبخصوص الاشتراك البريدي حاليا صار في خدمة RSS المشهورة بكل المواقع حتى المجاني منها عم يقدمها ( هي باختصار عبارة عن اشتراك عن طريق المتصفح او عن طريق صفحة غوغل الاساسية بحيث انو تحت مربع البحث بغوغل بيطلعلك بلوك فيو آخر اخبار كل موقع انت مشترك فيو )
اللي عامل الموقع مانو مزبطها ولا كأنو سمعان فيها .. اجبروه يعملها لأنها من اساسيات مواقع المستقبل وضرورية كتير واذا ما كان اليوم فمع الايام بدها تصير ضرورية
فباعتبار عم يتم التجديد ليش حتى ما يتضمن الموقع هلميزة ؟

•  آخر النقط اللي لازم يتم النظر فيها

ميزة التعليقات على الأخبار مانها كتير ضرورية ( وشفنا انو ما كان حدا عم يعلق على الاخبار بالموقع القديم )
بس المنتدى بعتقد ضروري وبيعمل جو بالنادي
مو شرط يكون منتدى بنفس الداتابيز للويبسايت ممكن ينعمل على داتابيز منفصلة بدومين فرعي للدومين الاساسي متل
fans.jalaaclub.com
وينحطلو لينك او صورة بالصفحة الرئيسية للموقع
وخلي يكون اله نفس الهيدر والفوتر ما بأثر هلشي على فعالية الموقع ولا على جماليتو
ولك حتى لو كان المنتدى بغير ديزاين المهم انو يجمتعو جماعة الشبيبة
لأن من وقت ما سكر فيفا جلاء ونحن مشنطتين بالصفحات وآخر شي صفينا بقسم صغير من منتدى تحويشة
اي ما حلوة ولو زبطولنا ياها



بحب ارجع اعرض خدماتي الكاملة والمجانية للنادي اللي منحبوا ومنتمى يظهر بأحسن صيغة ممكنة .وأيا طلب أو مساعدة بيطلبها النادي انا مستعد لبيو على قد طاقتي .. بالاخير هاد النادي نادينا ... أحلى ايامي قضيتا فيو والي الفخر اني لبست فانيلتو بيوم من الأيام على أرض الملعب
واللي بدو ياني بيقدر ياخد ايميلي من ( راسني ) بأعلى الصفحة .