قال خلصت السنة

سنة !
يعني اذا بدك تبحلق فيها بتطلع معك عبارة عن 12 شهر او اذا بتحب تشوفا من غير زاوية ممكن تطلع معك 52 اسبوع او8760 يوم وحتى بتقدر تقول 525600 دقيقة
وبأحسن الاحوال يعني اذا كنت كتير متفائل وبتحب الحياة بتشوفها شغلة كبيرة انو شو يابي السنة هية 3,153,600 ثانية جديدة من عمرك عم تنتظرك لتعيشها

بس يا صديقي هلأرقام بالذات يعني كيف ما قلبتها وشلتها وحطيتها رح تبقى ارقام ومو حايا الله ارقام .. ارقام بتدل على فترة زمنية رح تمشي غصبا عنك ( بياسفني كون اول شخص خبرك بهلشغلة بس هاد الواقع ) وانو انت في حال لاحظتها لهلثواني او ما لاحظتها فهنن عم يمرقو وحدة ورا التانية ولا حتى سائلين عنك وينك انت او مين انت
انو فكرك وانت نايم بوقف الوقت مثلا ؟
او فكرك اذا كنت منتظر لتشوف شو صار بالازمة الاقتصادية بالعالم رح يمشي الوقت بشكل أسرع لتصير على علم ومعرفة بأحداث الكرة البيضوية ؟

منرجع للسنة بزمنيتها
ديما بحس من ردات الفعل انو في سخط على كلشي قديم راح .. في كره للسنة اللي مضت بغض النظر عن حالة الرضا على الذات خلال الوقت اللي عم يقيم فيو الواحد
انو في راحة لفكرة ( خلصت السنة ) وفي راحة اكتر بتخلقو فكرة ( رح تبلش سنة جديدة )
يمكن اسمو تفاؤل.. انا عندي التفاؤل غير شي بس انو هاد بحسب قواميس البشرية متعارف عليو تحت اسم تفاؤل
بس عدم المؤاخذة يعني حضرتك متفائل بالسنة الجديدة ؟ شي عظيم ! ما هوي التفاؤل شي كتير حلو
بس تذكر انو كلما كنت متشائم اكتر كلما كنت راضي اكتر بالفتافيت الصغيرة اللي عم تحصل عليها من الاكل
وكلما كنت متشائم اكتر كلما انبسطت بالشي الحلو اللي بالاصل هوي خارج نطاق توقعاتك
هلشي ما بيتعاكس مع فكرة الامل والطموح
ما قلتلك انا بالاول التفاؤل بالنسبة الي بيختلف يمكن عن تعريفك اله
بس انو خليك متشائم
اي متشائم بالمعنى السلبي والايجابي وما بينهما
بترتاح بس ما بتريّح الحواليك .. بس الاهم انك انت بتكون مرتاح بأغلب الفترات

كل سنة العالم بتحط طموح .. آمال .. أهداف ..
بتلاقيها نازلة كبس بهلأمنيات ولو ما كانت الامنيات ببلاش ما كنت شفت حدا عم يتمنى بهلأيام
لا والاحلى أنو اهداف السنة غالبا بتكون متل السنة اللي فاتت أو بتكون اهداف يعني كيف بدي قلك ياها همممممممممم بعالم المستديرة بقولولك ( اهداف محققة ) فهمت علي كيف

اول نقطة مفيدة ممكن انك تعملها ببداية السنة هية انك تعرف مين انت
ولحتى تعرف مين انت لازم تعرف أنو لا تاريخ ميلادك ( اللي هوي تاريخ اول ضربة الك بهلحياة على مؤخرتك ) ولا تاريخ بداية السنة هنن الاجزاء او التفاصيل اللي بتحددلك بداية مشوارك او بحددلك ضرورة بداية مشاريعك المؤجلة
صدقني هية مؤجلة مو لأنو تاريخها لسعتو مو زابط
انو ما كنت عم تكتب بمدونتك لأنو رقم 2010 مانو عاجبك ؟ مكتئب !! وكأنك كنت بيوم من الايام مانك هيك !
عم تستنى تلاقي شغل احسن حتى تترك شغلك اللي انت قرفانو وحاسس انو صاحب الشغل فيو عم يستغلك لآخر درجة ؟ اي بدك تستنى كتير وبقلك المتل ( عيش يا كديش تينبت الحشيش )
قلتلي بدك تعمل دورات لغة ..همممممم حابب تتعلم ديزاين وفوتوشوب .. آها مافي سيولة فهمت عليك
لك مو لهلسبب لغيت دورة السواقة بزمناتك ولهلق ما معك حق اتطالع الشهادة ؟
انو ما عندك وقت .. يعني فكرك بالـ 2011 رح يزيد اليوم ساعة لتفضى تكتب فيها ؟ لك حتى ولو زاد بقص ايدي اذا ما بدك تقضيها نوم .

بدك تنزل علبلد بس فترة الاجازة ما عجبتك حاسسها قصيرة وأجلت النزلة للسنة الجاية .. آها .. قلتلي ما بتعرف اذا اخوك طويل ولا قصير لأنك مسافر من قبل ما يكتمل نموه .. ايواااااا .. حابة تتخرجي السنة وما بدك اتضيعي وقتك وعم تشتغلي على اطروحة تخرج .. عظيم .. تبقى بس تكون مقتنع/ـة بهلحكي ابقى اقنعني فيو
مشاريعك يا صديقي مؤجلة لأنو انت بدك ياها تكون مؤجلة
او لأنك انت مانك قادر تستوعب كيف ممكن تعيش بلا ما يكون عندك شي مؤجل

بعد كل هلحكي والفزلكة بطعمة وبلا طعمة حابب صحّيك لخبرك انو بداية السنة والمشروب والأكل بسهرة اليوم سببو بداية السنة ولا تسألني شقد هوي حدث مهم لأنو ما بقدر جاوبك بهلشغلة أو بالاحرى ما بعرف .. بس اللي بعرفو لا بل بعرفو ومتأكد منو هوي انو بدايتك بتبلش من عندك انت مو من عند السنة
ولا فكرك انو البشرية بدها تحتفلك وتشترك مع بعضها بصوت واحد بسلسلة عد تنازلي مشان تأعلنلك انو بلشت بداية مرحلة من حياتك
مانك حاسس انك كتير معظّم من حالك وعاطي لحالك فخامة اكتر مما بتستاهل ؟